درت غلا .....
درت غلا .... علقت روحى ما وصلت وَطا ..
من خيبتى يا ناس .
درته احْبَيِّبْ .
درته دواء للجرح فيه ايطـَيِّبْ .
وما احسبت ظنـِّى اليوم فيه ايخـَيِّبْ .
طلع عكس ما ظنـِّيتْ . عديم وَفـَــــا .
وما قدرت صوبه يا غوالى انسَيِّبْ .
القــــيته فـ كنينى . وفـ العروق سَـــرَا .
قعد كيف ظـُلى امعاىْ.ديمه اقرَيِّبْ .
امسيطر علَيا . جابلى الشـَّـقـَا .
وما القيت يا لـَصْحاب واحد طـَيِّبْ .
ايهوّن علـَـيَّا فـ حَالتى العَـنا .
موال الغلا يا ناس حق ايشـَيِّبْ .
ايجيب العذاب وما ايجيب زَها .
درت غـلا .... علقت روحى ما وصلت وَطا ..
من خيبتى يا ناس .
من خيبتى واهبالى .
درت الغلا موَّال ديمه فـ بالى .
نـبـى انـْجـرْبه . نِـبِّى اتروق احوالى .
القيته عـذاب . وما القيت دَوَاء .
وفى جـرْته يا ما تبهـدل حالى .
وفى جُرْته يا ما القلب شـكـَا .
إللى كنت مِـْمَـنـِّى انديـره غالى .
طلع وهم واخذنى . عليك بلا .
ومنه اقليبى اليوم تمه خالى .
والعين دارت بالدموع عَـزَا .
وما عاد نعشق لا انديـر غوالى .
وهذا قرارى واخده ابْرَضا .
درت غـلا .... علقت روحى ما وصلت وَطـَا ..
من خيبتى يا ناس .
للشاعر على يوسف
نشر بواسطة : غزيلة مصراتة