روعة غناوي العلم

جانى مستعجل مرسالك = ياللى مانى عد فى حالك

كم عام راجينا الغوالى = لكن باعونا فى التالى

جانى علم ونا ناسيهم = دارت يوم العين عليهم

منهده الاولاف عليهم =غير على طارى طاريهم

اللى متلايم والمنهد=فواهق عندى مالحد

عندى نقناق ايبكيكن = حتى من غير غواليكن

ماضنى كيفى لاوالى =فيك بكا يادار الغالى

كبار النار شكيلنا= قال عليك اعطاب دلالا

نار عزيز على مهلها =تاكل فيا ونستاهلها

مكابر نيران مراهين =انخطى نوطاهن يا عين

قزون وقزنى غالى =ماعد ينظر لى لاوالى

زازيت بنارك يا غالى = مابا يفزعلى لا والى

يا مرهون النار انهدت = توصل فيا ولا عد ردت

لذغة مرهون نوارينا = مامن اللى ولاتا فينا

طلقتو يا الاولاف علي = النيران ومافيدى شى

مرهون املوح منشابا = يلحق فينا ما نحسابا

غالى دار غلا من يالا =لليوم ايجرم فى حاله

الغالى غير اصعاب اموره = لا يلاى ولانى شورا

تبقى عندى حد الغايه = لو كان المنسى ايتهايا

ان كان خطر عداد اللوم =تباكن ماعد ساعه نوم

نار قديم وهى عثانه = حدعزا لنظار بكانا

انسيناكم يا القديمين = الدوه فى هالجديدين

طرواهم ع الياس ايضرك= ضنى خير اكميه فى سرك

يالاولاف انخاطا فيكم =مانى عد كى قبل انجيكم

تنويعك ياعين ايضرك = ع المرهون ابكى فى سرك

غنى ماحاضر فينا شى = تباعد حيل الكيد على

بعد خلوك المرهونين = احملتى فى روحك يا عين

فى ايام وناعندى شرها = ما نهاى العين نظرها

يا جياب نبا فرقاهم = يا ريتك عديت امعاهم

تسوتيهت الاوهام على = مرض لكن ما يقتل شى

ديما ياجوى متعكر = قاعد فى الاوهام انفكر

ننشد فى فسار منامى = قال ابكى ما فيه قسامى

شكيت التقاز وبراج = عللى فى قسمى نعواج

ننشد فى جياب فتاوى = قال انظرهم فى اى جلاوى

كان ابكاك ايداوى عقلى = ليل نهار عليه ادقلى

ملى داروها فى الخاطر = ديما يا عقلى تساطر

نشر بواسطة : عنان

نشر بواسطة : رواد

نشر بواسطة : غازى

نشر بواسطة : عزف الحروف

نشر بواسطة : سعاد الكاديكى