ايش فيه؟ وايش ما فيه؟ ** وليش طوّل نباك عليه ؟
العقل ينشد
ايش اهناك ؟ وايش ماهناك ؟ ** وليش طوّل عليه نباك ؟
اللى قبل صافى ياعزيز امعاك ** ويجيك طوع كيف ما تبّيه
وكان متهنّى وهو يالاك ** وما شىّ غيرك يا علم يرضيه
وكل حاجه ف الحياه افداك ** وغالى عليه وخير من ولديه
اليوم متردّى وهو يرجاك ** من طولة رجاك سنين ذوبتيه
شايل وحامل مرّ فى سبّاك ** وياما عذاب وقهر ما تدريه
كى انسيت لوعة غلاك هضاك ** ماكان ف الحسبان تغدر بيه
ايش صار؟ وايش ماصار **؟ وليش عنّا طوّلن لخبار؟
ولا جانا نباكم لا لفى خبّار **؟ من شور غاشيكم خبر ياتيه
طول نباكم يا بعاد الدار** من ضيق ضيقه صفق بيديه
العقل متحير واخذه تيار ** زايد عليه الفكر ومشقيه
قابى ايموّج بين نار ونار ** حاله تردى ييه ييه وييه
ايش القصه ؟ ** وليش خلّف غيابك غصّه ؟
وليش حبل الموده قصّه ؟** الياس بيديك ليش تبّعتيه ؟
بلحيل طبعك علينا عصّا ** بعد ياما سنين العقل دللتيه
فوق م الحصه وزادك حصّه ** كيفه غلا ف الوطن ما تلقيه
كيف العسل صافى لذيذ المصّه ** يبري جروح القلب ويداويه
من شورك امواجع لانقص لا خصّه ** مع كل تيقه موجعه تاتيه
ايش الدوّه ؟ ** وليش خلّف اغيابك هوّه؟
وليش عنا نباكم شوّى ** عنا نباكم ليش بطيتيه؟
مرسول منكم ما لفى لاتوّا ** طايل رجاه العقل رهدنتيه
سامر عقاب الليل جقّ و زوّى ** من طول ما سكلب نزح ماقيه
ايش فيه ؟ وايش مافيه ** وليش طوّل نباك عليه ؟
العقل ينشد
الإثنين 06 مايو 2024, 10:27 pm
الأحد 20 مايو 2012, 2:25 pm
لــكـ مــنــي أرق تحــيـــــــــة
