جيتك ونا مليوع ــ القيتك خلاء حتحتت فيك ادموع
يادار القدم جيتك ونا مليوع.
وين اعربك ــ بلا غايبك يادار غاب اطربك
كلاك الزمان وكي كلاك اشربك ــ ذنبي على اللي سيبك مدلوع
من يوماً رحل ما عاد يوم اقربك ــ لزمني ابكاء جيتك نصبت النوع
اسكون جامده يادار غير اكربك ــ دمي إلهم حتى وهو مقطوع
وجيتـك ونا مـليوع
يادار فيك غوالي ــ كانو ومازالو وقبل وتالي
المقعد امعاهم والسهر يحلالي ــ بنايت ابيوت اكبار وسط انجوع
اسياد السبيب اسياد عاالمتعالي ــ تاجاً لراسي باالذهب مرصوع
بو صيت شايل صيت كي لهلالي ــ هضاك هو اللي من غيبتا ملذوع
الخاطر، برم في الدار دار اليالي ــ مصفق مهب الريح والزعزوع
القيها خلاء ، تمت العين اتشالي ــ وكلي كنيني ملتهف مفروع
عليهم بكاء بكية قليلة والي ــ إمقّهر الخاطر ماالغلاء امخدوع
خطرها الدار وفاهقي والغالي ــ وبيت القصيدة صلب للميضوع
وجيتـك ونا مـليوع
يادار ناسك عدوا ــ اللي عاالصوابع باالوفاء ينعدوا
زعم وين مدو باالرحيل وشدوا ــ وخلوها خلاء لا حس لا مسموع
اللي وين ما جاهم عدو ينهدوا ــ يداعو عليه الموت باالمجموع
دون وطنهم ما هم اللي يجدوا ــ ايرفرف علمهم في السماء مرفوع
وماهم اللي عاالبايته ايتغدوا ــ عشاهم شعير وقمح ماالمزروع
جاويد ولنسل الاجواد ايردوا ــ احزام للظهور وللصدور ادروع
اليوم وينهم يادار عقلي كدوا ــ ان جيتك انعاود باالمرض ميجوع
وجيتـك ونا مـليوع
يادار ما تنهلبي ــ حتى لو جنج عقلي بعيد رحلبي
امشرق امغرب كان ما قبّلبي ــ انرايف انجيك انجول عاالمكشوع
اللي وين ما يجفل غمامة قلبي ــ تحلف مطر همّدلها هيزوع
يرقا صعايد ينحدر ينزلبي ــ إمنّسل جواد وللوعر مقدوع
مسارب افجوج امظلمه يدخلبي ــ في وطن مجدب والحطب مقلوع
ولا فيه ظل ايحيد عني غلبي ــ ولاهو ربيع ابخضرتا مرتوع
يقفز اسيوف الرمل متغوّلبي ــ اتقول ملتدغ باالسم ماالملسوع
يلهد قطع مشوار نين وصلبي ــ في دار لولي هضاك بو منسوع
وجيتـك ونا مـليوع
القيتك خلاء حتحتت فيك ادموع ـــ يادار القدم.........
الجمعة 17 مايو 2024, 11:43 pm
الثلاثاء 15 يناير 2013, 12:07 am
