يا صبر وين نلقاك....

يا صبر وين نلقاك...........وعليك أيش الدلايل
يا صبر كيف نلقاك..........وتخفف على العلايل

يا صبر طال مرجاك.........والهم فى القلب عايل
يا صبر أيش بطًاك..........أنظر أدموعى سوايل

يا صبر أقرب وهاك..........بنادم دلنًه علايل
يا صبر القلب ناداك........بروحه شايل الهوايل

يا صبر طالب أحماك........دايلينه أشيان الفعايل
يا صبر صبًره أمعاك.........كثرن سوايا العوايل
يا صبر أل همً مهلاك......والضيم جلاب الرزايل

يا صبر ضعنا أحذاك........دالوا علينا الوذايل
يا صبر تعلام الهلاك.......فى ألقلً وحظ مايل
يا صبر نحسابك رفيق......ونحسابها أتشطك أجروحى
يا صبر فى نص الطريق.....خلليتنى نمشى أبروحى

يا صبر خشًيت بى الغريق....سيبتنى ساعة جنوحى
يا صبر ناديت فى لحظة الضيق....وين جفً العسل من أجبوحى
يا صبر وين النحل هج م الصناديق......ويبست مراعى أسروحى

يا صبر هناك باع الصديق الصديق.....وقدام الكدر ذبلت أفروحى
يا صبر كنت دايرك ليًا صديق.....وكنت حاسبك كيف روحى
يا صبر وكنت عوزتى والشقيق.....ما نحسبك ترضاه نوحى

يا صبر غرًيت بى وان الحريق.......كى شبً ودمًر طموحى
يا صبر حتى وانت مرً فى الرًيق.....صابر على مرًك وموحى

رااااااااااائع ماقرات هنا من كلمات مميزة وراقية

انتقاء واختيار مميز

منور خوى

كلمات رائعة
الف شكر خويا

والله ما هناك غير الصبر

وع قول الشاعر
الصبر ما كيفه دوا لليعة ... وناس واجدة ياما كلت تلييعة