سبب تسكيبها...... قلة الحظ معا لطوط نصيبها
عندي العين ياصاحب
أسباب بكاها
شيلت أصحاب الحن من يالاها
وتبكي وماوالي إقدر ينهاها
ويكثر معا جيت الليل نحيبها
مريضة العين وموش غابي داها
غير ياطبيب الصوب ما تدريبها
ولاتصح يوم ولا يهاون داها
أمفيت ماقديم يعود ويجازيبها
سبب تسكيبها...... قلة الحظ معا لطوط نصيبها
أسباب مرضها
الحظ العطيب وقسمها قارضها
وماعمرها طقت العين غرضها
فا إللي أتريد وهو صحيح يريدها
بكاية مقابر منكسر خاطرها
نين فا البكاء لول إبقي ترتيبها
وميلة الوقت معا غياب عربها
تلاقن عليها وين نا نجريبها
سبب تسكيبها..... قلة الحظ معا لطوط نصيبها
أسباب شقاها
غيبت إللي شايل معاه دواها
ولابا يجي يطلب العين رضاها
تحلف عليه ألا تقول طليبها
خلاها تموج ودمعها وضاها
غير ربها هلي كريم حسيبها
بالك بعد جفوة وقطع ألواها
أمزان القسامي ينزلن شابيبها
سبب تسكيبها ....... قلة الحظ معا لطوط نصيبها
عندي العين ياصاحب
أمس في 10:41 pm
الثلاثاء 13 أغسطس 2013, 2:34 am
