رسم شاعرنا حوارا افتراضيا بين شاب والطاغية جاء فيه
الشاب
نريد ننشدك يا بو عبا خبرنى ...... عيشتنى فى ذل انـــــــــــــــــــا واندادى
نمشى فى طريق مظلمة جابرنـى ...... وانكانهو شكيت يبقى مصيرى غادى
وغادى مكان معيشته ادمرنــى....... سكنوه ياما من شبــــــــــــــــــاب بلادى
ابو عبا
انت من جاى اليوم بتناقشنى ...... خاين وما تسواش حتى بـــــــــــــــــــارة
مدفوعلك من الغرب بتعارضنى ...... عقاب جرذ الموت فيك اخســــــــــارة
انا ملك الملوك وصقر ما تعرفنى ...... انا المجد بانى ليبيا الجبـــــــــــــارة
الشاب
والله مانى جرذ ولانى خاين ...... انا شاب ليبى بيك صايف حالـــــــــــــــه
روحى فدا بلادى وليها صاين ...... محروم فيها وعايشــــــــــــــــــة التلتالة
خيراتنا على الغير واضح باين ...... وايدك علينا بالفقــــــــــــــــــــــر سيالة
بو عبا
انتوا تحكموا مانى عليكم حاكم ......وخيراتكم ما حد يحكم فيهــــــــــــــــــــا
العالم حسدكم نين هكى راكم ...... جنة تعيشوا زيها يبيهــــــــــــــــــــــــــــا
من يوم ما لخضر كتابى جاكم ...... سلطة وثروة انا اللى عاطيهــــــــــــــــا
الشاب
دجال ما فى كيفك ...... قداش ما جبت العسل فى روانــــــــــــــــــــــــــــــى
غاب الربيع طوّل معانا صيفك ...... شربت الغصايص والهموم انعانــــــــــى
فرعون ظالم دوم شاهر سيفك ...... عيشتنى فى قهر طول زمانـــــــــــــــــى
خود خيمتك خود ناقتك وخليفك ......جاك القضا يا بو عبا شيطانــــــــــــــــى