صب المر كان المر طاب ... موش امر من فقد الاحباب
صب المر خليه معقود
انكان تريد في حقي تجود
عليه ادمنت خذتا طق عود
لشرب المر جسمي يستجاب
وانكانك قلت يصهد ف الكبود
انقول هاذيك لكبود الرطاب
صب المر كان المر طاب
موش امر من فقد الحباب
صب المر صب
حتي المر عندي ينشرب
ونا والله ما جيتا رغب
الا من شي منا الفكر غاب
ها الزمان من قو العجب
نبت نوار في ذيول الكلاب
وها الزمان حبله منكرب
تسكر باب ينفتحن ابواب
وها الزمان بدناها سبب
يصير اخياب ويطيحن ارقاب
وها الزمان حتي م الحطب
العود الحر هارم م الجداب
وها الزمان حقيت الثلب
يقود الحشو فيهن لشراب
وها الزمان شياله اغلب
وشكا من شيل لحمول الصعاب
وها الزمان حتي في النسب
فيه الراي في ايدين الشباب
وها الزمان حتي الي كذب
القي من قال قال الا صواب
وها الزمان فيه الي اذهب
ريت العكس قالو ويش جاب
وها الزمان فيه الي خنب
عند الناس يحضا بي الاعجاب
وها الزمان سكن الخرب
بدو في بنى نطحات السحاب
وها الزمان فيت يفزع الرب
الا مافيه ماشي للخراب
ونا في الدهر راني ما نسب
انخاف الله وانخاف العقاب
وعندي عقل من طول الدرب
خذا ع المر ما ع المر تاب
عليش وليش منكم يا عرب
طرحت اسوال وانريد الجواب
ولو ما نخاف ناقع في مطب
ياما فيه عندي في الجراب
صب المر كان المر طاب ... موش امر من فقد الحباب