كلمات ملحمة النجع

اداء الفنانة ذكرى  محمد والفنان محمد حسن
جمع واعداد الاستاذ عبد الله منصور

1) المقدمة
كبيرة تقابل نارهم فى الليل=للذاهب دليل عليها سهارى جيل يحكى لجيل
كبرة تقابل نارهم فى الليل=بين العلاوى دارهم يجيبك حنين حوارهم ويجيبك صهيل الخيل
وتقذير مولاة الرحى=وامهاجتهم فى الحرث وقت السيل
وفى عرسهم تسمع زغاريد=اتجيبك من بعيد غناوة العلم والمجاريد والكشك والتطبيل
وكبيرة تقابل نارهم فى الليل
(2) النجع
يا نجع قيطان فى الصيف=وحدار وقت الليالى
هن تحت جنى العواطيف=فوق عاتيات الجمالى
وهم فوق سبق هفاهبف=عقاب تمرهم فى المخالى
مرحول فيه المرقم=وفيه الحلق فى بتاته
مع وادى الطلح سقم=وجن يلعبن رايدته
اللايح لفا من مقبل=على جيدات المهارة
وغير انشدوا كيف خبر=على نجعهم وين داره
لا لى معاهم حبيبا=ولا نوالف الا جباهم
وانكان خاضوا غريقا=ايخوضا جوادى معاهم
(3) حداء الابل
ما يشوبوا م البعد هم وياها=ولا تجظ م الحمل الثقيل عليها
مرافقينها طول الطريق معاها=ومسمح غتلهم وين يحذو فيها

الغناء
وحى عليها يا محاذى وحى=اللى رقابها كيف النعام مدحى
نادى عليها يا منادى نادى=اللى جايبه الاثقال م الابعادى
احنا من عقاب القايلة مدينا=لين شرعن الافجار ما واطينا
طول المخاطر والتعب خلاكن=ضمر حنايا شايبات ذراكن
يا قاطعة رقراق كيف النيلة=ويا وراده منهل طوال نخيلة
وانا نجيبك لو لويت قبالى=وانت تجيبى من عليا غالى
نا نجيبها من قبل ليا عادة=وهى تجيب من صابغ سواد هماده
حرام ما يجينى نوم ناويها=لين يعقبوا قارات سود وراها

(4) التهينيم(سقى الابل)
هاه امامى هاه امامى=الماء وادلى والعاطى حى
يا شرابه ماء بترابه=ويا رقابة روس العلو
ويا جيابه سمح صخابة=يا غباطات بارق ما بات
تمشى جوقات وتجى حاقات=خوذيه زلال يا زهو البال
خوذيه نقاق يا عوج ساق=داعوها جاى ناقة مشكاى
صبلها صب وهى تشرب=تروى لو تم مخضب بالدم
(5) طلاء الابل(المداواة)
منين ما شكت باين سبب مشكاها واسباب داها=ايجيبوا الدواء والمخارط ويشكوا معاها
نا وياك من بعد الحسايف=هانا فى رباويع السنين
انت لافيا نوار العطايف=ونا فرحان باللى غاليين

(6) اغانى الرحى(فى الابل)
يا ما شربتى على النقر=هللى مسقع شرابه
وياما خذيتى مالصقر=هللى معورج نقابه
يا جايبه تمر فزان=مصهد من الشمس طايب
يا قاطعة قور مابان=غيومة يديرين ضبايب
كحيلة تريد خوت=ايعولولها فى وتاها
واحد يجيب الجرارى=وواحد يمقس دلاها
وواحد على جالة الحوض=نزر وين شح ماها
ولاخر على ضهر الحصان=ايرودلها فى عشاها
(7) الخيل
هاذيم فى الليل=كيف القناديل
رداعة الميل=والحمل الثقيل
ايهدوا فوق=من صهوة الخيل
تغنى الرحى=وتزغرت النسوان
ويهاجى المهاجى فوق=فى الميدان ع الخيل والفرسان
ودون الوطن ما فيها جميل
ازرق وذيله مقبب=وسيدا على الحرب طايب
وديمه علوقه مرتب=سنين الرخا والجدايب
حمرا وحجلة وغره=وامجبره بالسوادى
عليها الغالى تحدا=وخاطر نهار العنادى

مهاجاة
أبيض كما ثوب منشور=وعاض الصريمة بنابه
وفوقه ولد زين مشهور=وسوق البلى ما يهابه
دارولها سرج وهجار=وزادو الكريده سماحة
رموها على سامر النار=وجت سالمة م الجراحة
مبروك يا الازرق عليك قلادة=جاتك هدية من كحيل همادة
ازرق كما لون الحمامة=وعالى مقامه يجللى الكدر وين نجبد لجمامه

السيل
عطيك سيل يا وادى جميل=يا مخلى الزرع صابه
شعيرك يجلول تجلويل=طعامك محنى رقابه

الحرث
1-الزرع:
اللى زرع نزرعوله=سوا حرب واللا عوافى
كيل الوفا نكيلوله=عياره نزيدوا وافى
يا عطاى بلامنا=اعطينا ونعطوا منا
2-الحرث:
علة محاريث الجمال دفاين=وانا علتى من جرح ما هو باين
علة محاريث الجمال الخافى=اللى مرتدم مرمى عليه السافى
ونا علتى من بو غثيث مسافى=لا هو قسم لاهو عليا هاين
3-الحصاد:
يازرع انجل= جاك المنجل
هاذى خرجه=والاخرى ترجى
تهايلى=تقول اقلى
جابوها جيب=اقلال العيب
يا حلو العيش=أسياطك ليش
سلم ارجالى=فضوا بالى
لولاد السمر=كمشتهم غمر
4-الدراسة:
ادراس القوايل ذيبلك يا عودة=ونا ذيبلتنى عين ترزى سودة
5-المذرة:
اليوم من مواويل الغلا متهنى=جبرنى عليه الياس ما هى طاعة
العون فى غلا العزاز ما عاونى=رميت المذارى فوق تبن القاعة

(9)اغانى الرحى
العين يا اصحاب الصوب من طولة الرجا=وين خطروا فايض ايسيل غديرها
وتبقى تهاجى كيف هاجاية الرحى=تودر عسيل النوم ساعة قذيرها
خطرن على مخاطير=والراس فوق الوسادة
جا دمع عينى بعاثير=منى بلا غير رادة
يا شمس كونى رسيلة= بين العزيز وبينى
واجضعى واشتكيله=من غيبته نور عينى
بعيدين واللا قريبين =والله الخاطر انسينا
سوال النبى يا عزيزين=دزوا نباكم يجينا
تنتين يا كامل الزين=كان درتهن زين حالك
مشيك مع جرة السيل=ولحوق صاحب سوالك
وتنتين يا كامل الزين=كان درتهن يخذلنك
هروبك من الضيف=وخيل العدا كان جنك
الرجل قالت اتعبنا=والعقل قال استراحوا
والعين قالت طربنا=غايب مع اللى انزاحوا
الرجل قالت عيينا=والعين قالت شكينا
والعقل قال اشقينا=وبعد الشقا نرتاحوا
واليوم هانا زهينا=وايام الشدايد راحو

(10) البير
يا نبع الحياة والخيروشاهد كبير=ع اللى جرى فيما مضى يا بير
اللى جايك عطشان=يمشى اللى رويان
وياما بكل حنان=غرد عليك الطير
وميعاد الغلا=وصوت الغنا
صبح ومساء=ياما رسم ع البير

(11) اغنية البير
هاناى لاقيت العزيز عليا=وهاناى ميعادنا اوقات عشية
هاناى جانى وارد=وهاناى لاقيت الغزال الشارد
وهاناى جانى بالمحبة جارد=وسلمتله قلبى رفعت ايدية
هاناى جانى ريدى=وهاناى ميلادى وهانا عيدى
هاناى ودعت العزيز وديدى=وهاناى سال الدمع من عينيه
هاناى صار غلاه=وهاناى درنا صوب نا وياه
هاناى من عقال صار خطاه=وهانا توازه بالفراق عليه

(12)بيت الجلاس
-المراءة:سلام.........
-الرجل:سلام ما هو طمع فى صوب امغير لاجل ثاريتك علم.
-المراءة:سلام.......
-الرجل:سلام غالبه الكلام انريدك اداويه يا علم.
-المراءة:سلام.......
-الرجل:سلامات يا مصواب عليك يا عزيز من غير معرفة.
-المراءة:سلام.......
-الرجل:يسلم عليك العقل سلامين والثالث غلاء.
-المراءة:المن؟
-الرجل:العيت تنشد توحل
-المراءة:وليش يا اصحاب الصوب اتديروا خطاء نين توحلوا.
-الرجل:المن؟
-المراءة:العيت قليل قدر فى ناشدينه.
-الرجل:ما عمر صاحب صوب قليل قدر فى ناشدينه.
-المراءة:عرفتنى
-الرجل:عرفه ما تغيهب فيه العقل وين لاقاه جارحه.
-المراءة:امكتف
-الرجل:مكتف مع رجليه ماسك السما بيدية
طلب نجاه لولاف خاطرى
-المراءة:تفضل انحطوك فى عشانا
-الرجل:لانى قديدا منشر ...ولانى شحم ضان غاوى
ولانى حليب ابل نين نشرب ع الشهاوى...ونطيح
فى عشاك انموت نبقى طليب لا يوم لاخرة.
-المراءة:ثلاث دارهن بو عقل خطاهن وهن موازين
الغلا...رهينة ولمة صوب وميعاد فى خفا
ان كان طلتهن غالى وان ما طلتهن مالك غلا
...وكذاب من ايقول اغليت وما طال هاذين
كلهن...وطريقنا مسكرة وبالحديد محكرة...
وما تمر عليها الا بعد ما تحط الرهينة فيها.
-الرجل:سطاوى ولد حداد وامعايا مفاتيح الطرق
-المراءة:عندى سبع صاعات قمح مبذورات حبة حبة
وبعد الحبة ع الحبة مشيت يومين على مهرية
اتلقطهن حبة حبة وتسلمهن ليه نكتب راك عزيز عليه
-الرجل:الشمس خجت والصلاة فريضة
ومشيك بلامار العزيز قريضة
والخاطر مساة الليل وانبات يا علم
غير يقرضك.
-المراءة:مسرحين بالرجلين محابيس فى الخاطر تجوا
-الرجل:نا والغراب خوتا ليا نلقطهن حبة حبة ونزيدوك معاهن مية
هذا لفظ لسانك قلتى راك عزيز عليا.......................
وخطرها يا بنية يا فارحة بالجية=امغير الغنا والتخاريف ما نريد غية
وامغير على السمع دوار العين مالها صاحب غلا=وانريدك لهن سهاوى لنظار يا علم
وين رايفن
وانريدك ان صار الصوب تبقى من محاريك الوفا=وانريدك ان صار العيب تبقى من
محاريك الهداء 


(13) الرحل
يادرب قارة وافى=ماريت لا مروا عليك أولافى
يادرب يا طويل=وشاهد على طول الزمان دليل
ماريت لا عدا عليك رحيل
هللى بلغهم بالحريى مرافى
عيونى عليهم سامرات الليل
تمنيت ما رضيوا نهار أخلافى
خبر عليهم دير فى جميل
هللى الخبر عنهم لذيذ وشافى
عدوا يحذوا فيه=مرحولهم قبل دليله بيه
ناوى ربيع النجع متمنيه
دونه مسافة شاسعة وفيافى
ومعاهم اللى قصدك تسال عليه
بوعين سودا بو غثيث مسافى
كيف ما شكيت انتا شكالى بيه
جرح المحبة والحبيب الجافى

(14) السيزة والتاقزة
-الاول:اكبر النار يا بو رفيق=ما نار كيف سدرة الوادى
وانصب السيزة زين=ولو حزت منك البادى
لا ينفعك بو ثنين=ولا تقلع فرادى
-الثانى:هكى وهكى يا قرين اديارها=وهكى وهكى شوكها وامرارها
كيف العسل ع الريق= وتقز لنا عن غيبها واخبارها
يا سيق ولا ضيق
-الاول:خوذ النوا يا مساول وانوى اللى فى بالك=والتاقزة بتفاول ع الله خير فالك
-الثانى:سلتك بالنبى والسيد على يا تاقزة ما تكذبى
جيبيلنا الاخبار=واحكيلنا شن صار
ظنك بعيد الدار=مازال يرجى فى
-الاول:خط الكف بياض والمسئول عنا اشهب
وخط الكف ضامر والمسئول عنا جبار

(15) اغنية التاقزة
سلت التقاز على الغالى=فول بيت بياض رمالى
ثانى بيت اشهب لا قالى=لشهب واخذ ع التلطيم
ثالث بيت عقاب اديارى=ضامر خلو ايدى يا نارى
رابع بيت لهم جبارى=ما بيت الجبار سليم
خامس بيت القبض يجينى=بالمقبوض لهم تبيينى
بو عقد ايدير تشرنينى=خوف عليه من التوغيم
سادس بيت رسن لولافى=مسترسن بو دور مسافى
غيبة لباس الرفرافى=طيب صافت بالتسليم
سابع بيت عقال الغايب=بيت هنا تحديد مصايب
غنواهم توليد عجايب=مكتوب عليه التعليم
ثامن بيت ازاوز دياره=بيت امان اثقل نياره
زاد عى مكعوم اسواره=ياس امجاور بالترسيم
تاسع بيت بياض رمالى=باب حسايفهم ولا لى
عاشر بيت اولاف غوالى=منزاحين اطاول مرجاهم يا عين
الخاطر مو لاقى للعين=لا هاوا غير المرهونين

(16) اغنية المخراز
ما زلت نشكى بمشكايا=وعلى الدباير غابت
وما زلت نخرز بمشفايا=على ركبتى نين عابت
ومازلت.. نا.. هو.. نا=وراء بو غثيث اتقول غيم اشتاء
وما زلت نا هو الاول=وما زلت حانى ركبتى وامطول
وما زلت فى صوب العزيز انعول=حتى كان ما رد الكفاء
واخذ على سوق الرحيل امهول=عندى البعد والدانى سواء

(17) اغنية الصوف
وراس خوك نغزل لهم غزل=رقيق السداء ما يقابل
زنضحكلهم ضحك هبل=نين يا منولى المهابل
.......................
ونحس الغلا فى كنيتى تعطرق=كما خيط مطرق
من بنت ريتها =فى الصوف تطرق

(1 الحطابة
-غناوة علم:
-الحطابة:حطبة ما كلتها نار انجوا فى ذراها ونقعدوا
-الرجل:سلامات يا حطابة
-الحطابة:سلامك وصل وعقلك احصل
ولولا الحطب ما هناك ظل
ولا فى الصحارى غابة
ولا نار فى فاهق خلا تشعل
ولا شاهى ولا طيابة
وسلامك وراه كلامك وايش الكلام اسبابه
-الرجل:نسلم عليكم سلامين=سلاما لجملة الحطابات
ونسلم على زهوة العين=عندى معاها صوب واحكايات
سوالى عليها وين غابت وين=ما قابلت عينى لها مدات
-الحطابة:كانت امعانا وغنيت فلانة=وحاضر امانة نبلغ سلامك ليها
وهات الاشارة انديروا دبارة وقول الامارة=وتوصل وصاتك فيها
-الرجل:قولولها امسرح ومانك امسرح=ومنك دليل العقل بات امجرح
خايف انفك اسراحك شوك الفراق ايجرح=وخايف انشد جناحك جرح الغلا ما ايفرح
ومربوحة توصى بيه رحل معاك واشون خاطرى

(19) اغنية من يوما عزيز
من يوما عزيز اختار روحه عنى=نازاد ما نختار روحى كنى
دار غوالى=واختارهم ما همتا فى حالى
نا ليش ما نختار راحة بالى=وننسى غلا هللى تباعد عنى

(20) اغنية وهى ما دزت
وهى ما دزت=ونا زاد ما دزيت روحى نفسى عزت
وهى ما هادت=ونا زاد ما هاديت نفسى كادت
وسبحان اللى بعد الباض اسوادت=نيتى على صابغ ميامى كزت
وهى ما سالت=ونازاد عينى لا مشت لا جالت
وبيناتنا قسوة كبيرة طالت=وانا ابصبر نفسى ما نهار اهتزت
هى محتارة=وتريدنى وامكابرة وصبارة
ونريدها لكن انريد ادبارة=واقسامنا لا قربت لا حزت

(21) عودة للمقدمة
كبيرة تقابل نارهم فى الليل=للذاهب دليل عليها سهارى جيل يحكى لجيل
كبرة تقابل نارهم فى الليل=بين العلاوى دارهم يجيبك حنين حوارهم ويجيبك صهيل الخيل
وتقذير مولاة الرحى=وامهاجتهم فى الحرث وقت السيل
وفى عرسهم تسمع زغاريد=اتجيبك من بعيد غناوة العلم والمجاريد والكشك والتطبيل
وكبيرة تقابل نارهم فى الليل

(22) العرس
-غناء مجاميع النساء:
حاضر النبى صلوا على حاضر النبى=محمد شفيع العبادة
طيب الذكر صلوا على طيب الذكر=محمد شفيع العبادة
-المشاطات فى بيت العروس:
يا سعم من عندها خو=ودزت الخوها ايجيها
يركبلها فوق حمرا=ايشق النواجع عليها
وقفت على جابر البيت=ونقت نقيق الحمامة
وحلفت لبوها باليمين=لك ما نسود عمامة
لا تكبكبى ولا تذلى=ولا تاخذى بو سكابه
خوذى ولد ما يولى=وسوق البلا ما يهابه


(23) اغنية ابن عم العروس
حكرت لو كان عندى قريب ودانى حبيب=ما ايجوا لولفتى وانا انطيب
حكرت لو كان عندى فزاع وقوة ذراع=اللى خدودها تقول بارق ارجاع
تعاود ولا شكعت بالقناع ولو تمشط الشيب= على افراقنا ما تنغصب تغصيب

-الاغانى المصاحبة للعروس:
....اغانى علم....
رانى نويت عزيز يا فال قولى نربحوا
فلانه حمامة برج تفوج كان ما داجيتها
القدر عندنا موجود وان طارت انجيبوا غيرها
مبروك يا علم ما درت صوبك اموالينا الكل
ربيعك اللى حزتيه نوار ورد وعروقه ذهب

(24) الجحفة...الكرمود...
العين اتمنى يا عزيز اتجيبك=اقسام حلوة بعد ياسك طال
حافل وفى كرمود وفى ترتيبك=معاك ع اليمين وع اليسار جمال
ونشدوا الجمل ونشرفوا تنسيبك=غالى وما كيفك علم ع البال
وتلقى مراسم فرح فى ترحيبك=خيل وصبايا يزغرتن وارجال
وتلقى شريكك فى الحياة ونصيبك=وينخن بنات النجع ع الطبال

(25) اغانى علم
عزيز كان بعيد=واليوم يا عينى قسم
لقدار يا عزيز اصعاب=ولغيرك الاما ينهدن

-رقصة معدان:
مرحبتين لفا غالينا...نور جبينه...قابل دار ضوايا زينة
مرجبتين لفا غالينا...واحنا جينا...جمله قدامه صبينا
نبى نتوب وعفلى ما زال...شها موال...مع اللى جوفه جوف غزال

(26) شد جمل
يا عينى صادك صوب جديد
مخلفلى كيف التنهيد
صوب غلاك اللى واضح يا عينى امعاك أونا صادق ما ينساك
وبالتأكيد معاك يزيد غلاء الوديد وشوق شديد نهار نشوفة عندى عيد

اصوب اولاف=اللى غاليتهم يا عين
عليهم نا دمعى ذراف=نجاتى منهم بين وبين
لا غنيوا لا صار اخلاف=ولا هم بالدار بعيدين
وعقلى من يومه ولاف=وهم زاد غولى زينين
ومن ضيم الفرقة خواف=مجرب من صوب قديمين
اللى كانوا للعين اولاف=غوالى واليوم مراهين
اسمعنى يا باهى الاوصاف=بكل وسيلة
عقلى راك خذيت دليلة=يانا من فايز فى جيلة ما هى ليله
نرجى فيه اسنين طويلة
يانا من فايز فى الجيل=نشاكية مشاكاة عليل
سريبى ناوياه طويل بصوب وحيله=جر الخاطر شد رحيله
عين اللى ى الفج هميل=انصار عزيله نتعب ونجول ونمشيله
يانا من بو دور غزير=غلاه امخلينى محتار
مخلينى فى حال عسير=انلاجى منا ليل نهار
ولا للعين القيت نظير=اينسيها فللى ما صار
غلا ما عندى غيره غير=غلا واضح للناس اجهار
غلا عنده مطراح كبير=سوا يقسم واللا يقصار
وودك لو غاليت اتدير=غلا هكى حتى ما صار
الغية موش عذاب مرير=زهاء ما هى يا عين امرار
قسامى والصوب مقادير=توازى وتلايم بالدار
ايقولوا ع اللى يصبر خير=سنين طويلة نرجى ما نرضاش بديلة
يانا من فايز فى جيلة ما هى ليله=نرجى فيه اسنين طويلة

(27) ايش قال الزناد
اول البادى بالصلاة ع الهادى=واهل السعادى كلهم حضار
وتانى تهنا خاطرى لاونه=كيف من تمنا فى الربيع وصار
وثالث ثاريتا صوب من غاليتا=شدايد القيتا والدليل احتار
والرابع رمانى فى الجروح انعانى=يا ريت ما غالانى لا صار موح الدار
والخامس خسارة ما القيت ادبارة =اتقرب ادياره نين يبقى جار
والسادس سلامى ولوعتى وملامى=على ما طريلى فى الزمان وصار
والسابع سريبة وودى انجيبه=ولافى المحبة غيبة محبة وفا واقدار
لكن ايطول للفجر الاول=وخير الكلام انقصروا المشوار
ونختم كلامى بالصلامة وسلامى=عليك يا نبى يا بو فاطمة المختار
....................
واسمعى يا بنية ويش قال الزناد:
انكان يا عزيز اغنيت=نا نحمل عازات الغلا
وانكان يا عزيز اقسمت=تزها العين طول عمرها
وان غاليت تاجد قلب=مفتوح يا عزيز للغلا
وان جافيت تلقى عزم=صبار يا عزيز ع الجفا

(2 الزفة
-استقبال العروس فى بيت العريس
-مجموعة من الاطفال وفى يد احدهم غطاء راس <الفافة>
.....غناء الاطفال.....
مرحبا بالافيه=جيتى خير وعافيه
مرحبه يا مرات خوى=يامنورة بيت بوى
..................
-مراسم ادخال العريس
.....غناء.....
يا سلطان عطاك العالى=جبت عيون الريم الفالى
تهنى يم عيون سماح=ايامك ولياليك املاح
صلى الله وعلى النبى=يشفع فينا السيدى
وعلى الرسول=يشفع فينا سيد القول
يا مولاى يا عطنا القبول=نا وياك يا ولقنى

(29) الكشك
-فى انتظار ظهور الحجالات
......الشتاوة......
غير اظهر يا غالى لنا=حل عليك ابواب الجنة
نرجوافيك بطيت علينا=يا مغرغز بالمرود عينه
نرجو فيك بطا مرسالك=فيسع لمة طية شالك
.....شتاوة.....
هن لثنين تقول اغزالة=ما خلن فى الخاطر بله
-ويش قال موال العلم
.....غناوة علم.....
يسيلن ادموع العين=وين يا غوالى تخطروا


(30) المجرودة
مرحبتين اهلا لا جيتى=كيف الحال وكيف امسيتى
مرحبتين بعد طليتى=عشتى شرفتى واعليتى
وانتى قدامى صبيتى =نحكيلك ما صاير فيه

نحكيلك من طول حياتى=فيا يا صارن حالتى
وين اندير غلا وواتى=نشقى بيه وغير انهاتى
بين ضحى وعشية ياتى=مكتوب ايوازى غياتى
ويجوزن حوز الياستى=هللى دار امعاى الغية

هللى غالانى وغاليته=سبحانه ما يوم انسيته
قلبى ما ينسى تاريته=صبرته واجد عانيته
ويطاوع ينسى يا ريته=ويعد الغالى ما ريته
لاجانى يوم ولا جيته=لا بادلنى لا وديته
نجفاه وننسى حنيته=حتى لو ما دار خطية

ناض العقل وقال صعيبه=نشهد بالله انها عيبة
كيف حبيب ايهون حبيبه=والمجروح ايفوت طبيبه
وانا موالى شاقى به=واخى لو ننساه انجيبه
عينى تجبد فى سريبة=ما ترقد فى النوم هنية

لا نرقد لا نوم ايجينى=قلتلها لا لا يا عينى
عقلى صادق جريتينى=لديار الغالى جبتينى
فى نار غلاه رميتينى=وين نهيتك ما طعتينى
هاو اليوم كبير حنينى=توبى وان كان اسمعتينى
توبى وان كان اسمعتينى=نا مانى فى باب الغية

نا شاقى بظروف كثيرة=قالت عينى فيها خيرة
لو تنساه اتوالف غيره=لكن ما تلقاش نظيره
يانا اللى منه فى حيره=فارق صارتلى تكديره
حتى لو ما نجبد سيره=عقلى زاد يساعد فيه

واخرى زاد العقل يهلك=ديمة صوب غلا شايلك
لكن من رضى يغفر لك=عقلى قال اللى صايرلك
ناسى قول اللى قايلك=لو تبعت العقل ايدلك
لو تبعت العين تضلك=بين ادروب طوال اتقلك
بين ادرول اطوال اتقلك=للى ما فيهم حنية

للى بالدار بعيدين=ويانا اللى بين البنين
وحاير نا بين الرايين =بين العقل وبن العين
وغيات اللى مرهونين=انحازوا واليوم بعيدين
ولا درت اولاف جديدين=ولا عندى فيهم قسمية

ولا عندى فى الزين اقسام=امغير كلام يجيب كلام
وغير ملام على ليام=اللا غية عين اللى حام
اسراب احلام=بناها عقلى ع الاوهام
العيب اللى تبقى ذمام=تقطع لوصال والارحام
ويا حضار الفين سلام=عليكم هى مسك الختام
الخاطر يا عين اللى حام=ايجظ خذا ليلة ما نام

(31) الموقف
لين عين ما كحل هذبها نوم=جفنى على هول الجفا صبار
ولى عقل من طول الرجا مقسوم=ومازال يرجى يا ابعاد الدار
ومن شبح مولاة اغلا محروم=وام السوالف ع الكتوف غمار
قولولها جارت عليا اهموم=ومن غبتك جرح المحبة جار
وليش القطيعة كان عندك لوم=قولى وخلى نعرفوا ما صار
انتى عارفة ما بينا مفهوم=احنا بينا عاهد غلا واقدار
وانتى بنت ناس اجواد للمظيوم=ملجأ من الغربى تقا و استار
ركابين للضامر اللى مكروم=ايهدوا على سامر لهيب النار
وين ما شكع بارق ودار أنسوم=ونزل على روس العلا لمطار
ايجوه من بعيد وجاردين اعموم=وهاضا دلال العين وام احوار
وان كان فى كحيلة تركب قوم=ايجوا دونها جملة اكبار اصغار
واللى راح فى الواجب هنى مرحوم=واللى عاش جايبهن ثنا وافخار
هاضا اللى خلاك عندك دوم=انتى من اصل صافى ما هواه غيار
انتى ع الوطا راسك رفيع السوم=تقيمى الغلا وتستاهلى لشكار

(32) الطبيلة
عينى من غيات علم تنزح وتجم=وديمة ديمة تشغل فى
وعقلى فايت فيه وتم غير ايخمم= م الشوق اللى جار على
ولكن عندى فيه عشم وعزيز ايهم=امعايا ما يبخل فى شى
مطمنى ويقول نعم انشيل الهم=معاك وحمل الصوب قوى
وصابر ماعنديش ندم سواء يقسم=غلا واللا ما يقسم لى
وكان حبيب العين اقسم غايب والتم=بعدها نرقد نوم هنى
وكان عزيز لغيرى ايتم الله يلهم=صواب العقل ايصبرنى
ونخى نخى يم ختم لين ليعلم=شرار الفجر ايدير الضى
ونا نحكيلك صوب علم...فايز فى جيله ...بين الناس قليل مثيلة
ونخى يم اقصاص طويلة...ع الطبيلة...جيناكم خطار الليلة
نخى يم اقصاص كبيرة...كم ضفيرة...طاح جدايل فوق حصيرة
مشاطة واحل فى حيرة...حار دليله...واحل فيه بكل وسيلة
نخى يا زينة للباس...ويم اقصاص...ويم غثيث اكداس اكداس
ويم عقود وزوز اخراص...ودار شعيلة...خدك بارق نزل سيلة

نخى يم غثيث طوالى=طاح ثناوى ع الجنبين
تقول نخل فى روس علاوى=مشابك بين عراجين
انتى غيرك ما هو فى بالى=ولا غيرك يزهى للعين
وكان غلاك اخرب هيالى=ننسى كيف النسايين
نعده كيف ركيب فالى=رايض ما بين وداوين
قيس صلاة العر التالى=ركبوا فيه الغزايين
وخشوا بيه سرير وخالى=موحش بان سرابه شين
الراعى جا للنجع ايشالى=قال خذوها من يومين
خبط ع الطبل وناض يلالى=ويجرد فى الفزاعين
عمرى يرخص دون حلالى=سيد المال حلف بيمين
التموا ناس اشداد عوالى=فلان فلان المشهورين
وست ايام وست اليالى=وهم جرتها تباعين
مع سابع يوم أم بهالى=بانت شافوها بالعين
وصار نهار طويل قتالى=هلها واللى غزايين

الحاصل يم غثيث طوالى جاب كحيلة...سيد الابل روح للعيلة
لكن راحو ناس غوالى ناس اصيلة...راحو دون بنات الميلة
ونخى يم اقصاص طويلة ع الطبيلة جيناكم خطار الليلة

(33) ضمة القشة
شرهانة العين تريد مع عزيز لو تعيش طول عمرها
يوم اتجيها تشاكى حبيب الروح ويشاكيها وتعاتب علية وليش غاب عليها
بعدها انكان غاب عزيز تحتار نين نوحلوا فى أمرها
يوم ايقرب..اللى شبحها ديمة العين ايطرب...واللى ما عرف جرح الغلا ما جرب
ايلوم وين ما ايشوف العين تموج بحسابه قصير نظهرها
وطول عمرها.......................

(34) الختام
دام دام عرس المحبة ديمة
ودامت اعراس النجع..ودامت افراح الخيمة
ودامت عوايد هلنا...هى زادنا ومنهلنا
وامجادنا العظيمة

الله يرحمهم الاثنين كانو علامات فارقة فى اغانى النجع
شكرا عالموضوع

:شكر4:

ذوق راقي
رؤؤؤعة فعلا