قالت جبرني الشوق ... ونا زاد جابرني الزمان انذوق ... امرار فى الغلا
شكت بوجــــــــــــــــــــاع ... وقالت مضيعني الشوق اضياع
ونا طول ليلي فى عنا وصراع ... وله زمان ماطاش النضر لافوق
ليلة اشتاء لاهدو لافزاع ... ولاشمس من تحت السحاب اتوق
مسافر على مركب بدفع شراع ... قماش فى عمود بشيركو معلوق
لاجل ضميري ما رضي ينباع ... حتى وين داروا للضماير سوق
جبرني قالـــــــــــت ... وسيول دمعها كيف المواقي سالت
ونا في عذابي دمعتي مازالت ... تسيل وين ماعاشق طرا معشوق
امغالي زمان اعزاز كى ماغالت ... وكى فراقها مفارق مع الفروق
وحامل نكد خمسين عام توالت ... صليب على حملي ونا ملحوق
شكت مالضيـــــــــــــــــــــــــم ... ونا زاد فى جوي مقابل غيم
المليوع ما يسمر بداه سليم ... والنار مايحس بها الا المحروق
نا فى حياتي سلوتي تخميم ... متباعد على درب الزها مزنوق
القيت الحياة بعكس لمفاهيم ... نزلت دار فى مقلب ارياح اصفوق