نساوين اسمهم المستادنات يجبوهم حوش العريس وحوش العروسة
يعنى كل واحد عنده مستادنات بروحه
هدم النساوين وظيفتهم يعزموا الاحباب والاقارب وجيران والاصدقاء ويديروا
حوش العرس سهرية يوم الأربعاء في الليل اسمها سهرية المستادنات ويرحبوا
بيهم ويكرمهم ويدربكو ويغنوا معهم ويديروا شاهي العالة وطبعا يفرقوا الكعك
الحلو والمالح على الاقارب وجيران
وفي يوم الخميس الصبح بعد مايفطروا المستادنات والعويلة العرس يطرحوا
المستادنات هديك المحرمة وكل وحدة من العويلة العرس يحطوا فلوس
للمتسادنات وكل قدير وقدره ويمشوا ومعهم بنية من العيلة ويعزموا الاقارب
والاحباب والاصدقاء وكل حوش يخشوله يعزموهم على العرس يعطوهم
فلوس ماكتب من ربي كل قدير وقدره ويرحبو بيهم ويزغرطو معهم ويضيفهم
وهما طالعين يبخوهم بصنة ويروحوا لحوش العرس وكان معزيمهم مازال هلبه
يمشوا في العشية تاني يعزموا اللي مازال ولما يروحوا لحوش العرس يشوفوا
الفلوس اللي حصلوها كان باهية هوينه كان هذا حوش العرس ايزدوها بعدها
يقعدو في حوش العرس يطيبوا الماكلة ويكونوا واقفين على الغدى والعشى
ويغسلوا المعاعين في العرس كله وبعدها يمشوا مع العروسة لحوش العريس
ويقعدو واقفين بشمع قدام باب دار العروسة لين يطلع العريس
وبعدها يزغرطوا مع الزيانة وتعطيهم ماكتب من ربي