عطيني سلف عينك بنبكي بيها
لي عين جف الدمع من ماقيها
تكون قوية
بكاية وتدرف في الدموع سخية
لي عين بخلت بالدموع عليا
نزح دمعها ماعاد بلة فيها
اسنين واجدة بكيتها المدعية
وكان دمعها حتى الوطا يرويها
واليوم ريتها في بكيها مرخية
لو لقيت بكايا لها نشريها
عطيني سلف عينك ودير جميل
تبكي معايا للهموم تشيل
وقول خاطري ما شي مستحيل
الا كون عيني ترجع لماضيها
جميلة وما تشوفش الا الجميل
وباقي الخلايق كل ما يعنيها
تذرف معايا كل صبح وليل
وانا لا نسكتها ولا نطريها
سلفني سلف عينك ودمع يسيل
مليان خاطري بهموم غالب فيها
نبي بكاها
بكا عين فقدت خوتها وضناها
وين ما بكت بكت اللي بحداها
على هول ياسر قبل صاير فيها
ولين ايتخلط دمعها بدماها
يسيل دمع يكنس الارض باللي فيها
الفوق صوتها يتعب اللي ينهاها
اتفرج علي يا صاحبي خليها
تكون سريعة
بالدمع وين نامرها تكون مطيعة
ولا نريد تصبيرة ولا تلكيعة
دموع حارة لهذوب تنزل بيها
مظلوم خاطري في شرع كل شريعة
وما يحس بالجمرة الا واطيها
واللي تخدمه واجب عليك اتطيعه
والبيع خير من رهنت اللي تبيها