لاننى من عشاق فارس الكلمة المبدع نعيم الزوى
جبتلكم كلمات التقى فيها من احببت من الشعراء
بعث نعيم الزوى
برسالة لصديقه رجب الشيخى
يقوله :
اختلطن عليا أمور .... دبر عليا يا رجب او شور
اليوم خاطرى
ما عرفتش كنى
ضيق خاطرى من الوقت والا منى
نبكى عقاب الليل غصبن عنـــــــــــى
معذور رانى يا رجب معـــــــــــذور
ألتمن عليا جروح ما خلنـــــــــــــــــى
أندير راى من عقلى ونا مقهـــــــور
نكذب على روحى انى متهنــــــــــى
ونكذب عليك نقولك مســــــــــــــرور
حتى ونا عزمـــــــــــــــى قوى بكنى
ليام خلن خاطرى مكســـــــــــــــــور
مرات تلقانى معاك نغنـــــــــــــــــــى
امغير جو عايش فيـــــــه واخد دور
رد عليه رجب الشيخى
دابينك سهران
توضا وصلى لربنا الرحمـــــــن
واقرا ايات شوى م القـــــــوران
حتى ولو كانن عقاب سطـــــور
واساع ترقد ليلتك مطمــــــــــان
ترتاح ما يقولوا قفز مذعــــــور
مرات ضيقة علم م الشيطـــــان
منه تعوذ وين بيك ايـــــــــــدور
راهو كلام الله فيه امـــــــــــــــان
جرب كلامى وشوف ماهو زور
ونا صاحبك لو كانك زعـــــلان
ارمى علي لو خاطرك مكســور
كونك رفيقى حط ف الحســــبان
عنك نشبل الحمل نا مجبــــــــور
ويزيد يقوله عناد الشوق
يصونك المولى نعيم يزهى بالك .... سرك يهدى بخير ديمة حالك
ما تشوف سو
خاطرك مجبـــــــــــــــــــــــــور
ترقد معاه الليل مو مكســــــــــور
جعلنك عزيز فى عيشتك مسـرور
يبعد عليك الهم القلب دعالـــــــــك
والله يحفظك بكلمتك منصــــــــور
زين الشباب بفعايلك ومقالـــــــــك
على الله ارمى حمولـــــــــــــــــــــك
قدرك عليه ما حد كاتبهولـــــــــك
ندعى المولى الخير قاسمهولـــــك
نفسك نقية باهيات اعمالـــــــــــك
راحة البال والصدر يشرحهولـــك
وامغير رحمته يازوى ما يسوالك
ما تشوف قهايـــــــــــــــــــــــــــــــر
ياللى بشعرك درت فينا امايـــــــر
دونك رفاقة جواد ما تتخايــــــــــر
يزهوا بزهاك ويزعلوا لزعالـــــك
يريدوك زاهى دوم حالك نايـــــــر
العاطى المولى ودنيتك تزهالـــــك
ما تشوف سو يا نعيم
رد الزوى على راس البيت
يا اعناد الشوق
تما العقــل معاك ديمــا ايروق
وتميت مربح كيف ربح السوق
وين ما على بانن اردود افعالك
وتميت كيف الشمس وان اشروق
نورك عمانــى وين جيت اقبالك
وتميت ف العالى شكع وبروق
مازال مـــاوالى صعد لا طالك
ومـــازلت عالى فى سمايا فوق
وين ما معاك ازهيت بيه دلالك
يعاود عناد الشوق الرد على راس البيت
أبياتك مسك يا مسك الجـــــداوى
بديع النظم فى أشعارك سطــاوى
عالى بيه ركــّاز العـــــــــــلاوى
لسان فصيح المولــــــــى عطالك
فى جذب الشعر كلماتـــك رواوى
تروى الروح والخاطـــــر دعالك
اليوم في 6:53 am
الجمعة 21 سبتمبر 2012, 2:52 pm
