مازال شاغل بالي ومازال غالي كيف قبل وتالي
حتى وهو غني
مازلت فيه انفكر
وقلبي علي غيره الباب امسكر
مايمتحى م العقل فيه انحكر
حتى بعد يمضن عليه اجالي
وان زهوتي يخطر البال ايعكر
وناكل ايجي بيني وبين اوكالي
مازال فيه رجايا
ومازال هو غاية حدود امنايه
ومازال مانقبل ولا سهرايه
امفيت هو مقصود فتح اسوالي
ومازلت انتمنى عزيز معايا
ان كان ماقسم حطم جميع امالي
عليه انمامي
وديما اتقدع صورته قدامي
اونرقد ايجي بيني وبين منامي
نوعا عقاب الليل يشغل بالي
امرايف علي خزرة اعيون الدامي
هفّن علي امعاه ريت ليالي
او مازلت في نقناقه
ومازال غالي كيف يوم افراقه
ومازلن ايهدّن علي اشواقه
وماجبهن لزام لا رسالي
ومازلت في مرجى كحيل ارماقه
ومازال هو المكسب وهو راس مالي
كنا كنا
في شوق زايد في صفاء ومحنه
ورد الغلا داير علينا جنه
حب وهنا وعزيز دوم اقبالي
لاياس لاناقر ايجي شاغلنه
والموح مانطروه غير تسالي
مازلت كامي شوقه
ومازال عامر في كنيني سوقه
وقتن اتزهزه ان تم ف اخر روقه
ورد الغلا دالن عليه قبالي
هوازيع متبعات جنه بوقه
كيف من قتل في الليل واصبح جالي
مازال شاغل بالي ومازال غالي كيف قبل وتالي حتى وهو غني
أمس في 10:27 pm
الخميس 22 فبراير 2018, 12:44 pm
