كيف الراي ياعيون النداوي .....علي بعيد وني فيك غاوي
كيف الراي ياعيون المصفا....يابودور يطايح بخفة
يابوخد يضاو وشفة......رغم البعد ني فيك هاوي
ايميح غتيت وتعاود تلفه......سمح الون يسافا ملاوي
بنت اجواد عيشتها بعفة.....وصف الريم سكان العلاوي
وعقلي يموج يصافق بكفه......نار الشوق خلاتا هواوي
طلبتك يابوسالف اسفه.....تكون حنون ولمرجاي ناوي
وكتر الدمع بلااه كفه.......ايجينا يوم ونعيشو هناوي
كيف الراي ياعين المجلا.... يلي قهرت الناس كلا
جمالك حر مافيك خلا.....ربي دار في وصفك حكاوي
عفيف الروح بطيبة تعلا......جميل الطبع بوخد ضاوي
يامبهاه بلمشية اسلا .......دوب تخط عفستها هكاوي
العب غلاك بعقلي وقله.....وراك اندوح وانت ماك ماوي
روف علي عني ماتخلا......حرقت القلب كاويه كاوي
نرجا فيك ياسمحت الطلة.....عني ماتستمعي دواوي
انت القلب وانتي الروح كلا.....نبض القلب غنالك غناوي
يامشكاي ياعمري وحله......ماخليت لي عقلي لهاوي
غلاك انصون ماساعة انمله....ونزها بيه وجروحي انداوي
كيف الراي ياعيون الغزال....يالي واخد عقلي بدلاال
اهبالي وراك ماكيفا اهبال......وقلبي معاك ماعندا رساوي
دوم غلاك دايرلي اسوال.......نسال بيه في روحي سهاوي
شريد الدهن ماعندي مجال......غلاك صحيح محتاج لفتاوي
وجيلي ني ماو كيف لجيال.......يتعب طول مايقدر يلاوي
قهرنا الصوب دارلنا احبال......ربطنا كيف ربط ام الغاوي
ارقاق الكبد مايغباك حال.......ارقاق العزم غيتنا عناوي
طلبت الله يعدل فلحوال......ويقرب زول بخدودا نقاوي
نعيشو فعز عيشتنا حلاال......اكرام النفس من ربي هداوي
بجاه اللي ماكيفا امتال .......شفيع الناس من كل البلاوي
كيف الراي ياعيون الندواي ....... علي بعيد وني فيك غاوي