حوار بين شاعر وحبيبته التى تزوجت غيره
للشاعر الشعبي ميلود بوسلة
قال الشاعر :
يكفي غلا يزي غلا يكفيني ........ ليش الغلا دامه عذاب يجيني
ليش الغلا نشقابه ................. وليش الغلا دامه كثير أتعابه
وكنت الغلا ياحبيبتي نحسابه ... تبقي معايا طول العمر وترافقيني
لين كيف قلبي جامعين أصحابه .... وإنت عروس محنية بتجيني
لكن غلاك اليوم قافل بابه ........... ولاعاد بنشوفك ولاتشوفيني
وقلبي نساه الحب هاللي صابه ...... ماضي جميل قداش واعدتيني
نقضتي وعودك ليش ياكذابة ............ بلامال لحزارنا بعتيني
ردت عليه حبيبته :
بالله ماتظلمني ................. وبالله عاللي صار ماتخاصمني
وهاللي جري يامحبوب ماهو مني وحق حبنا وحق ربنا وحق ديني
وكل ماحدث ياناس غصبن عني .. غصبن عليا رغم أنفي وعيني
الشايب حلف بيمين مايرحمني ... ولو مانوافق في البحر يرميني
ولو مانوافق قال بيعدمني ............ ولو مانوافق قال بيجليني
ووافقت عنه الشيء اللي مزعلني .... عيل صغير السن مايسليني
وبالله يامحبوب ماتظلمني .......... وماتقول بطلت الغلا يزيني
الشاعر :
مادام مالك حيلة ................ ويش قربك للحب ومواويله
وغير ليش بتخلي العيون غبينة .. ولو نشربه دمع العيون يرويني
ونا كل صاحب بالهموم نشكيله ..... يبكي معاي بدمع ويواسيني
من فرقته مولي العيون كحيلة .... من القلب نا عاطيه كل حنيني
إخترتك رفيق دون البنات بجيله وياريتني لا أخترتك لا أخترتيني
الحبيبة :
غير ليش يا غاليا ........... وغير ليش في شعرك تلوم عليا
ولومك عاللي مصاحبه بنية ... ومعاه تبعث في الورق ويجيني
ومعاه تبعث في الرسايل ليا ...... كلام الرسايل فيه بتوصيني
واليوم أهو خان دار السيا ........... بالعيب بيكافيك ويكافيني
نسا حبنا هو جاي يخطب فيا ........ كيف الدبارة دلني وريني
انا صابرة ونطلب الله عالية .... من شايب وولده يفكني ينجيني
تعود الحياة وتعود روحي ليا .. ويبرا الجرح اللي كان بيكويني
وأيام تكتب في قصايد غية ...... وأيام تمشي معاي وتحاديني
الشاعر :
قداش ماتلاقينا ............. وقداش في وقت الظلام حكينا
وقداش كنا شابكين إيدينا ....... وقداش من ميعاد واعدتيني
وكاس الغلا قداش فيه خذينا .. وكاس المحبة شربتيه وسقيتيني
وقداش من مرسول بتوصينا .. كلام الرسايل ماعاد بيرضيني
واليوم وليتي بعيدة علينا ........ واليوم لا نلومك ولا تلوميني
واليوم دامه الحظ مو مواتينا .... واليوم لا نعاتبك ولا تعاتبيني
عروس غيرنا ماكش عروسه لينا .. يابنت لا نحاكيك لا تحاكيني
خوذي الرسايل وأرحلي يازينة ..وكفي دموعك واصبري ياعيني
الحبيبة :
ناخذ رحيلي منك ............. ومادام ترغب في رحيلي عنك
تغيرت ياحبيبي معاي كنك ....... بلا ذنب ليش اليوم بتجافيني
ونا الشعر بنخليه يبقي فنك ......... وإنت لدمع العين بتخليني
الشاعر :
والله يامحبوبة ............... فعلا الشايب كاثرات عيوبه
أما الطفل عيل شيرته مذهوبة ولو كان يقدر من الوجود ينفيني
ونحساب بتخشي معاي لجوبة .... في خير وإلا شر بتعاتبيني
ولكن خسارة ياغزير هدوبه .. طلعتي ضعيفة نفس ماعجبتيني
وبلا قلب وجروحي بدت معطوبة .... لابال قصة حبنا تبكيني
وكل حد منا ينظره مكتوبة .. وأنا مسامحك وإنتي عليك سامحيني
ويكفي غلا يزي غلا يكفيني ..... ليش الغلا دامه عذاب يجيني
أمس في 12:03 am
الجمعة 08 ديسمبر 2017, 9:46 pm
