خرافة أم الابيار

كان يا ماكان بين الريف ومدينة من مدن الزمان
كان فيه راجل اسمه مبروك وارفيقته اسمها رقيه وكان عندهم 11 العيل كلهم على روس بعض ..
كانوا عايشين في البر والمدينه كانت بعيده هلبا عليهم لدرجة انهم مايعرفوش حتى كيف شكلها ...
اتلخبطط الظروف والفقر انتشر والمزيريا بدت في كل مكان ..فقرر السي مبروك انه يمشي للمدينه 
بالك يلقى اخديمه ايوكل بيها صغاره ..
لم اقشيشه واتسقد للمدينه هوا وصغاره وزوجته وأول ما وصلوا قال هكي وافتح خيمته وابدى ينصب فيها 
وفجأه جوه الناس .. ممنوع يا خونا .. تي وين بتنصب خيمه في المدينه .. تي شن اتدير انت 
رد عليهم مبروك .. مالا وين بنسكن انا وحداش الراص اللي معاي ..
رد عليه واحد منهم برا اشري حوش ولا اكريه راهو الخيمه ممنوع هنا 
تعفلق السي مبروك واتوكل هو وصغاره وامهم وقعدوا ايدوروا في المدينه ويسألو عالايجارات 
وكل ما يسألو حد على الايجار ..يطلع غالي والسعر نار ..
اليأس بدى يتغلغل في هديكا العيله والتعب واخد فيهم حصه وفجأه والسي مبروك حاط ايده على راسه 
وايخمم اوقف عليه راجل وقاله نشبح فيك اتدور في حوش ولاسعار غاليه 
السي مبروك رد اي والله يا خوي ..نشهد بالله ما نقدر عليها
رد الراجل عندي سانيه في حواشي المدينه والسانيه فيها حوش كبير ايسدك انت وصغارك 
 والحق انا نبي انأجرها بسعر ارخص شوي من السوق 
رد السي مبروك .. الله يبارك فيك ويرحم والديك واعتبرني أجرتها مدام ارخص من باقي المكانات 
رد الراجل لكن راهو بتسمع صوت في الليل طالع من البير رد بالك اتجي جيهته ولا تقربه لا انت ولا صغارك
ديرو روحكم ما تسمعوا في شي لن يطلع الصبح وبعدها تو يسكت الصوت ودير ما تبي 
قعد مبروك يخمم ويشبح لصغاره ويشبح لمرته رقيه والتعب والهم والفقر واخد فيهم حصه ضحكتله رقيه وقالتله 
توكل على الله يا مبروك مانا خايفين من شي 
تلفت مبروك للراجل وقاله موافق المهم نبو نسكنوا 
اتفاهم هو والراجل عالايجار واتسقد مبروك وعيلته وامشو للسانيه وأول ما خشوا فروحو بالحوش اللي فيها ..
كان قصر مش حوش وكان وكله اثات فخم والديار عد واغلط والصغار من الفرحه يلعبو ويجروا مش امصدقين 
ومبروك اينظف في الجنانات ورقيه تمسح في الغبره والعيله كلها تتحرك والسعاده قريب تطلع من عيونهم 
فات النهار وفات المغرب واتلقطو كلهم في دار وحده ورقيه جابت المبكبكه وطاحولها ماكله لن لحسو هديكا القصعه لحس 
بعدها صلو العشى واللي هدا اتسقد وامشى لفراشه مساكين طاحو زي الرطب من التعب والجري لي صارلهم 
المهم بعد رقدوا وفي نص الليل فاقت رقيه وهي تسمع في صوت مرا اتعيط واتنوح على ايامتها السود 
رقيه نوض يا مبروك نوض في مرا اتعيط البرا رد عليها ياساتر ترا تعالي يارقيه خل انشوفوا خيرها
طلعوا الزوز يتجاروا لن وصلوا لفم الباب فتحوا الباب وشافوا ايمين ايسار مافيش حد 
رقيه يا مبروك الصوت جاي من البير بالك طايحه فيه المرا وتبي من ايطلعها منه 
رد مبروك مش بعيد هدا الصوت اللي قالنا عليه الراجل فكينا يا مرا وخشي ارقدي هدي شكلها غوله 
وهيا في حاله وحنى في حالنا وبينا وبينها رسول الله 
خشت رقيه ومبروك ورجعوا للنوم لكن رقيه قلبها طيب وارهيف وما اقتنعتش ان الصوت جاي من غوله
وقعدت ااتقول في قلبها ما شفنا الغوله في البر بنشوفوها في المدينه 
المهم خلت مبروك يرجع للنوم وقالت هكي حطت رداها وطلعت جيهة البير كل ماكانت رقيه تقرب 
الصوت كان يزيد اكتر واكتر لن وصلت للبير
طبست عالبير تبي تشوف شن فيه ودوره تطلعها جهامه سودا وشعرها طايح قدام وجهها طاااارت فووووق 
وبعدها نزلت بسرعه وقعمزت جنب رقيه 
رقيه من الخوف انسمطت ومعاش قدرت تتحرك من مكانها وهديكا الغوله تشبحلها من فوق للوطى 
وفجأه ابدت الغوله اتقول كان ايحبني ورقيه من الرعب ترد عليها ااااايه كان ايحبك
تعاود الغوله وتقول كان امدلعني ترد عليها رقيه اي نعم كان امدلعك
وبرا ساعتين على هالحال وهديكا الغوله تبكي وتندب وتعاود في نفس الكلام ورقيه من الخوف اترد عليها 
لين فجأه اعييت وتعبت هيكا الغوله وسكتت معاش قالت كلمه 
شافتلها رقيه وحست انها معاش خايفه منها بالعكس يخي حست انها مظلومه واتسخف لن حتى رقيه دموعها نزلو
وبدت تسأل فيها ياغوله خيرك علاش البكى والنواح والنديب هدا كله قوليلي بالك انساعدك
سكتتت الغوله شوي وعرفت ان رقيه مرا باهية وطيبه وبعد ما ارتاحتلها بدت هديكا الغوله تحكي في قصتها لرقيه 
وقالت انا كنت بنت تاجر فلوسه ما تحرقهم نار وكان بوي يحكم ويطلق والناس مدايرين طابور غير باش يسلموا عليه 
وكان عندنا هلبا اخدم واحشم ومن بينهم كان فيه خديم لسانه حلو هلبا ومن كلامه الحلو حبيته وكبرت علاقتي معاه 
وطلبت من بوي انه يوافق على زواجي بيه 
وافق بوي واتزوجنا وكان كلامه معاي كله حلو ويعامل فيا بحب وامدلعني غير شن نبي بس ومن درجة حبه ليا 
حتى بوي لاحظ هالشي وزادت تقة بوي فيه اكتر واكتر واعطاه هلبا فلوس ومن خادم ابدى امير وتاجر كبير 
بعد فتره اتوفى بوي وربي خدى امانته فاتوا ايام واسابيع وشهور وكل يوم بديت انلاحظ ان الراجل بدى يتغير عليا 
وبدى كلامه الحلو ينقص ومعاش امدلعني وهداكا الحب كله راح . 
ومره مره ايجيني ايقولي اعطيني الورق متع رزق بوك لأنه عندي بيه شغل 
قلت معليش انسايره ونعطيه الورق لكن المشكله ان بوي ما قالش الورق وين لما توفى وقد ما دورت ما لقيتاش 
ولما قتله ما لقيتش الورق متع رزق بوي زاد كرهه ليا لين يوم من الايام وانا نازله من دار نومي شديته هوا 
ووحده من الخدم ايخون فيا معاها وايهدرزو والحب بيناتهم طلع قديم ومن قبل حتى ما يتزوجني وكأنه كل شي كان مخطط 
ما تحملتش الموقف وقعدت انعيط عليه بصوت عالي وفجأه جاني يجري وضربني بموس في قلبي لن دمي سال وهو يرشق 
في موسه ويقول حتى بلا ورق الرزق كله بدى ليا وبعدها قطعني طروف واحدفني في البير هدا 
من يومها وانا نطلع نندب على الحب اللي كان بيني وبينه ومش قادره ننسى حلاوة ايامي معاه مع اني لو ننسى حتمشي 
اللعنه من عليا ومعاش نطلع لحد ولا عاد نقعد غوله .
رقيه دموعها في عيونها من القصه اللي سمعتها ما اتوقعتش انه فيه شر من الناس بهالشكل ووجعتها هديكا الغوله 
في فم كبدها  قالتلها يا غوله ( اتفكري سياته تنسيه ) بما معناه اتفكري الشر متاعه وشن كان ايديرلك تو تنسيه 
لكن لو قعدتي تتفكري في الكدب والحب والايام الحلوه اللي مثلها عليك مش حتنسي شي 
الغوله لما سمعتها تقول ربي خدى حاجه وحط حاجه بدى شكلها زي النور ووجها ابيض زي القمر 
شبحت لرقيه وقالتها ( الذهب ما ياكلاش الصديد ) بمعنى انتي يا رقيه معدنك باهي 
وقالتها الورق متع رزق بوي كله كان مدسوس تحت ساقية البيروهدي قصتي كتبتها في ورقه وبري لمحامي 
بوي تلقيه في المكان الفلاني اعطيه الورقه واحكيله قصتي وقوليله عظامي مزالو في البير والموس متاعه
 مرشوق في قلبي باش ياخد عقابه 
وانتي يا رقيه اهو الورق متع رزق بوي كله عندك وبري عيشي انتي وصغارك وزوجك الطيب 
لا تخونيه ولا ايخونك

محلاه خراف زمان
تسلمى

ومضات الزمن الجميل
كل الاحترام والود

يعطيك الف عافية اختى الغالية
تسلمى يارب

سلمت الايادى