ماكيف زولك حد.....خودي كلامي وافهميه بجد
معاد تزعلي
ماكيف زولك زول....يلي تركتي خاطري مشغول
يلي دلالك في الغلا مقبول....يلي اوصافك صاعبه تنعد
يلي جبينك ناير ومشعول....ياغالية ياضوية في الخد
يلي غتيتك لاورا مفتول.....يبرم علي ضهرك ايجي ممتد
يلي خطاوي مشيتك معدول......ماكيف مشيك ع الوطا ينعد
سمحة جميلة وافية في الطول ......يلي فرشقاتك اتجي ترجد
يلي نشلتي البال جاك ايجول......يجدد غلاك وبعدها يرتد
ليش الزعل وانا بديت ملول......من كتر هجرك بانيتلي سد
ونسكت بغيضي شن تبيني انقول......وندعي انشالله الصبر ماينفد
نبي نقولك مازال راني انعول.....علي صوب درته مانبي ينهد
زول افرادي....مافيش كيفه في حضر وابوادي
مربا بعزة من اجواد سعادي....ناس تابته ع الخير ماتبعد
وهلها اكرام وفعلهم متقادي.....طيب عللهم من اجدود الجد
وعنوي علي المولا الدور نضادي....هلي جرف عقلي قداه رقد
وصف المربا في فجوج هوادي.....في بر واسع بلخضار حشد
بعيد عن شبح الناس والروادي.....هميل فجلايب في ابساط ومد
يعين ليش اليوم زول مرادي......عني تباعد مايبيش يرد
شن شاغلا عني وشن المبادي.....والا غلاهم منهله نافد
مسلم اموري للكريم الهادي......يغير احوالي بعد طول نكد
ونرتاح من تفكير ناس ابعادي......هجرو بقسوة ناوين اجدد
ماكيف زولك حد....خودي كلامي وافهميه بجد.....معاد تزعلي