انتي يا درنه
ابرم يا طير وشوف الحال وخلّك ع الحاله شاهد
زنازين يهدن الرجال عرب خشوها ملا حد
وخطرها قول اللي قال علي الهم انّوض ونرقد
وخلك في نفس الموال جناحاتك ديما فارد
انريدك يا طويري حمّال سلامات اتوصل واترد
علي حفره ما بين اجبال ومن غادي شلال وسد
اجعنّا يا مضرب الامثال اللي ناوي هدّك ينهد
انتي يا درنه دمك سال ودمعاتك سالن ع الخد
انتي غدرو بك انذال لفايا ملمومين لمد
انتي يا درنه من المحال اتكوني مرتع للجاحد
انتي يا درنه يا ام اجيال تربو فوق جظارة جد
انتي يا درنه يا ام دلال وعز وتاريخك يشهد
انتي يا درنه يا ام ابطال اللي ماهو سامع ينشد
انتي يا درنه لك مياّل القلب وما نقدر نجحد
انتي يا درنه زهوة بال اللي يقرب منك يسعد
سواقي يجرن والشلال وخضره وطوير يغرد
انتي شطّك هادي ورمال بحر صافي والموج همد
انتي مانك ماضي ينزال انتي امس وتوا والغد
بودّك لو تقعد جوّال اسبوع وما ظنيتي يسد
علي درنه تبرم لو طال الوقت ومن بعدين تمد
وتزرد في راس الهلال انكان ناوي فيها تزرد
انتي زدتي عن الوصف جمال وشوكه في عين الحاسد
الله يخرب بيت الدجال علي راسه عرشه يقلب
نشر بواسطة : درناوية والفخر ليا
الإثنين 22 أبريل 2024, 11:13 pm
الثلاثاء 12 يونيو 2012, 11:20 am
