قال الشاعر نعيم الزوى
هما هما
نـفـس الـوجـوه اللـى اتـجيـب الغمه
كــيـف أمــس كيـف الـيـوم
هما همّا
نـــفــس الــــــنـاس ..
و نفـس الاسامى اللى اتجيب الياس
كـــذب ونفـــاق وظـلـم و اخــتــلاس
ويــن مـا أيـبانــوا يـسـرقـوا المهمــه
عاشــــوا على قـــل الوفا واخــلاص
تربــــــــوا على يده زعيم الامـــــه
نـفــــس احـــــمــيده ..
ونفس الوجـوه الـلـى زمـان زهـيده
مـا تــقـول جدت فـى لـبلاد جديده
ولا هناك عـيل مـات ضـحـى بـدمه
ولا تــقــول شـاب اليـوم فاقـد أيدة
و فــاقــد أقــدامـة و لــنـظار وفمّة
نفس الحال
ونفــس الرزالــه وطيحــــة المزال
ونفس ال**** ونفس نهب المـال
واللى روانه الســـم زايد سمـــه
اليــوم ناس تسلـــق على لحبال
على كل خـــوطه واقفـــه ملتمه
رد الشاعر صلاح عبيد من مدينة مصراته
نـــفـــس الـــحـــوســـة ..
و نـفـس الألحان و نـفـسهن بالدوسه
لــيـن نـفـسنا تـمّــت الاّ مـحـبـوسـة
علي ناس بين الــنــاس هـي منـذمّه
علي أشكال خطوتها بقت مـــدروسـة
واضحين * ياصاحـــب . أقـلال الهمّـــه
نــفــــس الــــقــصّــة
و نــفـــس الحكاوي و نفـسـهـا بالبصّه
كـم ألــف غـصّــة حاصــلة فــي غـصـّة
فـــــى أقـلـبــونا دارت هـــوايـــل جـمّه
مــن ناس طالــت مــن وطـنـّا حــصــة
كــلـــــو حقـنـا و الـوطـــن زادوا هـمّة
انـــــعيـــدو الثورة ..
ثورة وراء ثورة وراها ثورة
أنكانهو بقى هالظلم يلعب دورة .
و بقيو اللي من قبل باعوا الذمّة
و ما يوم تبقــى أبلادنا مكسورة ..
أحنا شعب متماسك وفوق القمة
رد الشاعر جبر الصبيحى
نفس الدوه
ونفس الوجـــــوه اتريدنا بالقوه
ونفس الفسس مازال هوا هوا
عصابه كبيره وسطنا ملتمـــه
نفس الظلم
ونفس المطامــــع لوله والحلم
جهال تحلــــف ماكساهم علم
شاريين الشهايد بايعين الذمه
رد العراب
نفس الشى
خفافيش تلغا فى دمنا يا زوى
تعيش فى ظلام متباعدة ع الضى
وين يظهرو صلاّح لبسو عمة
تسمع كلام يخدرك يا وخى
تشوف الفعال صنعة قلال الهمة
نفس الزومة
سود النفوس وافعالها مذمومة
رطابة لفاعى غادرة مسمومة
بلاعيط ديمة ما يراعو ذمة
يجيبوا العسل فى القول باش ترومه
ولو بيدهم حتى الهوا ما تشمه
نفس القوم
فيسع تلاقت على الفريسة تحوم
رطابة لسان وقولها منغوم
ثياب بيض من برة وداخل رمة
كم وغد صيته فى العلن مقيوم
وهو ردى واطى وما يتسمى
هما هما
نـفـس الـوجـوه اللـى اتـجيـب الغمه
كــيـف أمــس كيـف الـيـوم هما همّا
الإثنين 22 أبريل 2024, 11:13 pm
الأربعاء 01 فبراير 2012, 12:20 am
