لغيركم خلوه عمار الوطن انكان ما تقدوه

كتب شاعرنا
قصيدة مهداة الى كل من يشعر ان كلماتها تنطبق عليه

لغيركم خلوه ....... عمار الوطن انكان ما تقدوه
ديروا استقالة لغيركم خلوه

كافى صراع ......................... وكافى فتن وبلبلة وصداع
ساد الوطن ماهوش حمل اوجاع ....... يبى رجال فى شيلته يعينوه
سواعد فتية مالهاش اطماع ............. تشيد صروحه للسما يعلوه

كافى مصايب ....................... وكافى سرايا والوية وكتايب
وكافى بكا هالى ضناها غايب ............. دم الشهيد بافعالكم خنتوه
محتاج الوطن لاحرار خوت حبايب ........ يكفوا نزيف الدم ويداووه

الوطن طال عذابه ................. عانى سنين من طاغية واذنابه
وين ما فرح نقزت عليه اذيابة...... يا نويرتى على وطن ما رحموه
كل من بكا بانت اليوم نيابه ............. طاح القناع تسابقوا نهشوه

ما ينكتب فى يوم ................ تبيعوا وطن غالى برخص السوم
ما هو غنيمة يا طيور البوم ............ دونه صقورة جارحة يحموه
كل من طغى عالوطن عنده يوم ....... كيف العقيد من حفرته يجروه

لغيركم خلوه ........................ عمار الوطن انكان ما تقدوه
ديروا استقالة لغيركم خلوه

تقول عارف شن فى بالى فى هذا الموضوع
بردت على قلبى
ولكن هات من يفهم
رووووووووووووووووعة
الف تحية لشاعرنا المميز
وشكرا لك بسطامى

صدقت خويا عناد
صح لسانك ع القصيدة الحلوة والمعبرة على حالنا
دائما متميز
شكرا بسطامى

كافى مصايب ....................... وكافى سرايا والوية وكتايب
وكافى بكا هالى ضناها غايب ............. دم الشهيد بافعالكم خنتوه

ليك الله يا ليبيا
صح لسان شاعرنا
مشكورين

مسحت على قلوبنا
مشكوور خونا

الله عليك شاعرنا المميز
صدقت الوطن ماهو حمل اوجاع جديدة
ابداع كالعادة
الف شكر

ربى يحفظ بلادنا ويهد كل من ينوالها الشر
والله قصيدة عبرت على همنا وهم الوطن
مشكور شاعرنا وصح لسانك
وشكرا ليك بسطامى

ليبيا اكبر من الجميع
والتاريخ ما يرحمش
مش غريب على شاعرنا العزيز
مشكووووووووور

قوية القصيدة

كلام يمسح ع الكبيدة
ولكن هات من يفهم
شكرا شاعرنا

يعطيك العافية
ع الطرح الرائع والمتميز
وسلمت الايادي ع المواضيع الجميلة

الوطن طال عذابه ................. عانى سنين من طاغية واذنابه
وين ما فرح نقزت عليه اذيابة...... يا نويرتى على وطن ما رحموه
كل من بكا بانت اليوم نيابه ............. طاح القناع تسابقوا نهشوه

هذا اللى صاير توا
مسكينة ليبيا

هنا و أمام هذا الصرح الرائع


توقفت كثيرا كثيرا


وكأن الكلمات زلزالا يزيح عن كاهلنا ما نعاني . . .


بوركت شاعرنا


وشكرا لأخي بسطامي . ..


وقى الله بلادنا شر الفتن ما ظهر منها وما بطن .

***********

كل الشكر والتقدير لكل من عطر صفحتى بمروره العليل
واخص بالشكر اخى بسطامى العزيز
ولعل كلماتى هذه تكون اليوم الانسب لما تمر به بلادنا العزيزة ليبيا
حفظها الله وحفظ شعبها الطيب