خرافة عزوزة الستوت

شوق عدد المساهمات : 1536 عضوية : 29/09/2010

نخرفلكم خرافة في البحر جرافة بوكم بوسعدية وامكم الدفدافة وحناكم الكرنافة وياحزاااااركم يامزااااركم على عزوزة الستوت اعوذ بالله منها حاشاكم ومن شطانتها اللي غلبت حتى الشيطان نفسه اعوذ بالله منه المهم هاالعزيز تسكن في قرية القرية اهلها كلهم طيبين وبسيطين ويخافو ربي ويديهم بيدين بعض وعايشين في سلام وامان ماشاءالله وعندهم شيخ عالم فقيه يعلم فيهم في دينهم وماشي حالهم ياسلام وهذا كله مش عاجب الشيطان اعوذ بالله منه وحاول الف مرة يخرب عليهم ويخش بيناتهم ويفسد بينهم لكن ماقدرش وكل محاولاته ضاعت ع الفاضي واستعان بصغاره حتى هما باش يخربو بين ها الناس الطيبة وقلوبهم البيضاء وحبهم لبعضهم مافيش فائدة ماحدش منهم قدر يفسد والا يخرب وهذا كله خلى الشيطان يتعفلق ويحمق ويهبل وماعادش عرف شن يدير ومرة من المرات خطمت بحذاه عزوزة الستوت ولقاته حاير ومتعفلق ومهموم قالت له خيرك شنو فيه شنو صاير شكلك مهموم وطايرتلك من شنو قاللها من ها القرية وها الناس حيروني على قد ماخططت نبي نخرب بينهم ونفرقهم انا وصغاري ماقدرنا فقالت له هذا هو اللي محيرك وشاغل بالك ؟ قاللها هذا هو قالت له انا نساعدك لكن على شرط قاللها شنو شرطك وخودي اللي تبيه غير فرقي بيهم واشفي غليلي منهم قالتله نبي قفطان وبلغة جداد قاللها حاضر توة يكونو عندك غير هيا للعمل وريني شن بتديري فيهم وفرحيني .
مشت العزوز باش تنفد خطتها ومشت طوالي لحوش الشيخ الفقيه متع القرية ودقت الباب فتحتلها زوجته وقالت لها يابنيتي انا عطشانة وتعبانة بالله شريبة مية نبل بها ريقي فقالتلها المرأة الطيبة حاضر غير تفضلي خشي ارتاحي وخشت العزوز وشافت هاذاك الحوش وهاذاك العز وجت طاسة المية ومعاها ماكتب ربي وشربت العزوز وقعمزت ارتاحت وبعد شوي قالت للمرأة حوشك قنين وواسع ومرتاح والتقعميزة فيه تسر الخاطر وراجلك مامقصر معاك في شيء ولكن ياخسارة الحلو مايكملش استغربت المرإة من كلامها الاخير وقالتلها خيره شنو فيه قالتلها شكلك ماتعرفيش راهو راجلك متزوج عليك ،، انصدمت المرأة من كلامها وقالتلها راجلي يحبني هلبة وفرحان بيا معقولة يتزوج عليا ؟ قالتلها اي نعم متزوج ،، قعدت تبكي وتعيط وترعش مشت عزوزة الستوت قالتلها ماتخافيش وماتعيطيش وماترعشيش انا توة نساعدك ومايمضي يوم غدوة الا لما يطلقها وتفتكي منها غير اسمعي اللي نقولك عليه ،. قالتلها باهي شنو تبيني ندير ؟ قالتلها الليلة لما يجي راجلك يبي يرقد خاوتيه وقصي من شعر لحيته سبعة شعرات وقصيهم بالموس وردي بالك يحس بيك ومن غدوة تلقي الضرة تطلقت قالتلها باهي .
طلعت العزوز من هنا ومشت تجري للشيخ وطلبت مقابلته وقالت لها ياشيخ سمعت مرتك تبي تقتلك قاللها شنو ها الكلام اللي تقولي فيه انا مرتي تحبني وهى مرأة تخاف ربي وطيبة وكويسة مستحيل تدير هكي قالتله برا للحوش وخش لدارك ودير روحك راقد وراقبها شنو تدير وفعلا خش الشك في راس الشيخ ودار زي ماقالتله العزوز وجت مرته وجابت الموس وبتقص الشعر وهو ظن انها بتقتله فمشي قتلها وماتت المرأة المسكينة
مشت هاديك العزوز تجري لي امالي المرأة وقالتلهم تعالو اجرو راهو الشيخ قتل بنتكم لانه كان يبي يتزوج عليها وهى مارضتش وتعارك معاها قتلها ،،، اجتمعو اماليها ومشو يجرو للشيخ وقعدو يضربو فيه لين مات مسكين وبعدها العزوز مشت تكمل في خطتها ومشت لاهل الشيخ وقالتلهم زودو الشيخ قتلوه نساباته ظلم وناضو يجرو يلقطو في روحهم ومشو باش يتعاركو مع اهل المرأة وقامت بينهم معركة وهذا يضرب هذا وهذا يقتل هذا ويالطيف الطف يارب على ها القرية اللي كانو طيبين ويخافو ربي كيف صارو عدوانيين وقتلة ومجرمين ونسو ربهم ونسو عقاب ربهم ونسو طيبتهم والامن والسلام اللي كانو عايشين فيه.
مشت العزوزة للشيطان وقالتله توة شن رايك شنو قولك بعد اللي صار وهى توة اعطيني اللي وعدتني به القفطان والبلغة ، مدلها الشيطان القفطان والبلغة وقاللها اللي يقدرك يحاسبني ومشي هرب منها هههه حتى هو خاف منها ومن شرها وهذه حكاية(( عزوز الستوت الله لا يرحمها وين تموت)) اكيد سمعتو باسمها من قبل الله يفكنا الشر جميعا

نشر بواسطة : شوق

وجدان عدد المساهمات : 21 عضوية : 08/07/2018

نسمع بيها واول مرة نعرف قصتها
تسلمى اختى شوق

نشر بواسطة : وجدان

قمر الزمان عدد المساهمات : 517 عضوية : 23/11/2011

محلاها خرفات زمان

نشر بواسطة : قمر الزمان

نشر بواسطة : كريمان الحاسى

زهرة الروح عدد المساهمات : 1983 عضوية : 04/09/2010

سلمت الايادى

نشر بواسطة : زهرة الروح

تسلمى شوق

نشر بواسطة : سكينة عبد الواحد

» خرافة أم الابيار
» خرافة ام بسيسى
» خرافة من التراث
» «قول الفجي».. خرافة ليبية تتحدى النميمة