مراحب ياعام اثمنتاش
اسمع نحكولك بالتفصيل
افهمها قصتنا بشواش
وداوي ماضينا العليل
العمر اخساره راح بلاش
وجيناك اليوم معاجيل
تمرمدنا من عام احداش
مواجعنا زادن بالحيل
انراجو فالخير وماجاش
ثمان اسنين شربنا الويل
اكملنا هاون واربعطاش
وعشوائي في نص الليل
نكد فينا تما وارعاش
وطول الليل دموع اتسيل
نزحنا وصارلنا طرطاش
وضعنا وماعد فيه سبيل
الشعب الليبي فالانعاش
وشايل حمل معاه ثقيل
الدوله جوها ناس اوباش
انسرقت ذلوها تذليل
اتدور راحه ماتلقاش
نزوح وتهجير وترحيل
اتداوي جرحك مايبراش
عذاب وتما الفرح قليل
وحتي الراتب والمعاش
ايجيك بعد مشوار طويل
وخبزتنا عند الكواش
احكايه نين اتهد الحيل
عرب ماتت ماوالي عاش
الجبانه كل انهار اتشيل