مرحبتين للشاعر يوسف الليبى

مرحبتين و مرحب بيك
انستي يا عين الشيهان
خود تفضل قلبي ليك
هدية ما فيهاش امنان
ضيحة نا بين لياليك
و بين ادموع وبين اجنان
سمحة و المولى عاطيك
مزايا من دون النسوان
لانك حمره م البلحيك
و لانك سمره م السودان
الخاطر دايب دوب عليك
مثيل السكر في الدوبان
انخطط و انعيد التكتيك
فـ صوبك ما نبي خسران
كلامك واسلوبك موزيك
الحان امسطرها فنان
شهادة من قلبي شاريك
جمالك يغلب ف المرجان
و نا حاسد جيرانك فيك
اللي ايشوفك يبقى طربان
طبيعي ما شابه تشكيك
سحر عيونك في الوجدان
عزا ما عندي فيه شريك
انكان القسم نوا الفرقان
انعيش علي طاري ماضيك
لخوفي تبقي من النسيان
ف كل احلامي نا راعيك
لـ كتابي تبقي عنوان

نشر بواسطة : لؤلؤة بنغازى