والع بيك ... مازال قلبى فى دقته يناديك
ما دار غيرك صوب
مكتوبلى نهواك
ومكتوبلى فى الصوب نلقى جفــاك
ومكتوبلى نكمل طريقى بــــــــــلاك
ومكتوبلى تبيعى وانا شاريــــــــــك
ومكتوبلى نحبك وما ننســــــــــــاك
ومكتوبلى تجفى وانا هاويــــــــــك
كيف صبرتى
وكيف قادرة تنسى غرامى هنتــــى
كيف طاوعك قلبك اليوم هجرتــــى
وكيف تغدرى بقلب نبضه ليـــــــــك
وكيف راضية بالموجعة تسببتــــــى
وكيف خاطرك يا قاسية مهنيــــــــك
ليش تجافى
وليش تخلفى عهد المحبة الصافــى
وليش تنكرى لوكان درتى خلافـــــى
وليش قاسية وانا حنون عليــــــــــك
وليش الفراق والشوق ما هو خافى
وليش الجفا والعمر زاهى بيـــــــــك
تمنيت ما لاقيتك
وتمنيت ما جيتى فى طريقى ريتــك
وتمنيت ما درت الغرام هويتـــــــــك
وتمنيت قلبى حر ما هو ليـــــــــــــك
تمنيت داير عزم ما راجيتــــــــــــــك
تمنيت قلبى بالجفا يكافيــــــــــــــــــك
من الصعب تبرى جروحى
ومن الصعب ننسى روح سكنت روحى
ومن الصعب نكمى لوعتى فى موحـــى
ومن الصعب نخفى لهفتى فى طاريــــك
ومن الصعب نكمى أهتى فى بوحــــــى
ومن الصعب يقدر خاطرى يجافيــــــــك
والع بيك ... مازال قلبى فى دقته يناديك
ما دار غيرك صوب
السبت 02 نوفمبر 2024, 7:26 am
الأربعاء 30 أكتوبر 2024, 10:08 pm
